الشعر الشعبي العراقي

محسن الخياط , عشك ساعه  يالحاشتك ايد الزمان وحاشت هموم  يالتيهتني بجول هجرك  تيهت الشوم  بيزاري حجييك ما يكد يومين و يكوم  نفاش حبك وبكصب عشرتك ملموم  بس انكسر عود الكصب شالة الهوه بزوم  كص ضلعي من تمرك علي و اكسرني لاكوم  غيرك عشك ساعه سهل و انت عشك دوم  رد كبع خدود الخضار بريحة الصيف  وبكل مزاوية الخضر رد كبع الريف   لشوك كلبي ضل طري ومتحزم بليف  وتلاشى حالوب الشته وانا انتظر طيف  وبالروحه و الرده الدرب كترين ملزوم  غيرك عشك ساعه سهل وانت عشك دوم هذا انه ملاح الجرف ذبه هوى الليل  تيه و مشحوفه شله بالحري ياويل  وشراعه مدري بيا كترعت ماخذه السيل  يالحبة الحلوه بهواك وريحة الهيل  يالعودك مكصمل وتازه وبرم مبروم  غيرك عشك ساعه سهل و انت عشك دووم اتمنى ان تنال اعجابكم 

  الشاعر الكبير عريان السيد خلف الغالبي  قصيدة توصيني  توصينــــي على يا ذمة توصــــــيني  وحياتي انت ونبع يسري بشراييني  يضل اسمك علامة توسم سنيني  ولونك مو دمع ما ضمتك عيني  ولونك مو كحل ما شالتك عيني    ويلوموني واحسك تكبر بروحي ويلوموني  يشوگي ورجوتي ودنياتي و لوني   وعذابي ولوعتي وشكواتي و ظنوني  يخيعونك عليه وبيك خيعوني    وانه بلا شوفتك شينفعن عيوني  يواهس تضحك الدنيا على شفافك يبو ليل الحلو اليلعب على جتافك احس روحي تأمن بيك و تخافك واحسك لغز شنهو انته و شنو وصافك ولا غيرك نبع بالشوك يروني توصيني على يا ذمة توصيني